സന്ദര്‍ഭം : ഹാര്‍ഡ് സ്പോട്ട് ചര്‍ച്ച
ആര്‍ .പി ഔദ്യോഗികമായി അംഗങ്ങളെ ഹാര്‍ഡ്‌സ്പോട്ട് സിംപ്ലിഫിക്കേഷന്‍ പ്രവര്‍ത്തനത്തിലേക്ക്
ക്ഷണിച്ചു.
ആദ്യമായി ചര്‍ച്ചക്ക് തുടക്കമിട്ടത് സൂര്യന്‍ മാഷായിരുന്നു.
മാഷ് വേദിയിലെക്ക് വന്ന് തന്റെ സ്ഥിരം ശൈലിയായ - സ്വന്തം കഷണ്ടിത്തലയെ രണ്ടു പ്രാവശ്യം
കൈകൊണ്ട് തലോടി- സംസാരിക്കുവാന്‍ തുടങ്ങി.
മാഷിന്റെ സംസാരിത്തിനുമുന്‍പുള്ള സ്ഥിരം രീതിയാണ് കഷണ്ടിത്തലയെ കൈകൊണ്ട് രണ്ട്
പ്രാവശ്യം തലോടല്‍ .
അതിനാല്‍ തന്നെ ഏറെ ഗഹനമായ ഒന്നാണ് മാഷ് അവതരിപ്പിക്കുവാന്‍ പോകുന്നതെന്ന്
അംഗങ്ങള്‍ക്ക് മനസ്സിലായി .
സൂര്യന്‍ മാഷ് തുടങ്ങി.
“ ഞാന്‍ വളച്ചുകെട്ടില്ലാതെ കാര്യത്തിലേക്കു കടക്കാം . സൂര്യനോ ചന്ദ്രനോ വലുത് ?”
“ഇതാണോ ഇത്ര വലിയ ഹാര്‍ഡ് സ്പോട്ട് ” ബാക്ക് ബഞ്ചിലിരുന്ന ബാക്ക് ഇ എം എഫ് മാഷ് വിളിച്ചൂ
പറഞ്ഞു.
“ഇത് അറിയാ‍ണ്ട് മാഷ് എങ്ങന്യാ ഫിസിക്സ് മാഷ് ആയേ ” ലെന്‍സി ടീച്ചര്‍ വിളിച്ചൂ കൂവി .
ക്ലാസില്‍ സൂര്യന്‍ മാഷിനോടുള്ള പരിഹാസച്ചിരി പ്രകടമായി .
“സൂര്യന്‍ തന്നെ മാഷെ . ചന്ദ്രനെക്കാള്‍ എത്രയോ വലുതാണ് സൂര്യന്‍ .” സാന്ദ്രത ടീച്ചര്‍
മധ്യസ്ഥയായി .
ഈ ഉത്തരം ലഭിച്ച ഉടനെ സൂര്യന്‍ മാഷ് വര്‍ദ്ധിച്ച ഉത്സാഹത്തോടെ പറഞ്ഞു.
“എങ്കില്‍ ; എന്തുകൊണ്ട് സൂര്യനേയും ചന്ദ്രനേയും നാം ഒരേ വലുപ്പത്തില്‍ കാണുന്നു?”
ക്ലാസ് പെട്ടെന്ന് നിശ്ശബ്ദമായി .
സംഗതിയുടെ ഗൌരവം എല്ലാ മുഖങ്ങളിലും പ്രകടമായി .
ലെന്‍സിടീച്ചര്‍ എണീറ്റുനിന്നുകൊണ്ട് പറഞ്ഞു തുടങ്ങി
“അത് ചിലപ്പോള്‍ നമ്മുടെ കണ്ണിന്റെ പ്രത്യേകത കൊണ്ടായിരിക്കാം . അതായത് വളരേ
അകലെയുള്ള വസ്തുക്കള്‍ ചെറുതായിട്ടാണ് കണ്ണ് രൂ‍പീകരിക്കുക. ഉദാഹരണത്തിന് , അകലെ
പോകുന്ന വിമാനത്തിന്റെ കാര്യം തന്നെ എടുത്താല്‍ മതി . വളരേ ചെറുതായിട്ടല്ലേ നാം കാണുന്നത് .
അതുപോലെ ഇതും കണ്ണിന്റെ ഒരു തകരാറെന്നോ പ്രത്യേകതയെന്നോ നമുക്ക് പറയാം .”
“ എങ്കിലും ഞാന്‍ ചോദിച്ച ചോദ്യത്തിന്റെ ഉത്തരത്തിലേക്ക് എത്തുന്നില്ലല്ലോ ടീച്ചറെ “ സൂര്യന്‍ മാഷ്
പറഞ്ഞു.
“ അതെ , പയറിന്റെ വില ചോദിച്ചാല്‍ കടലയുടെ വില പറഞ്ഞീട്ടെന്താ കാര്യം “
ന്യൂട്രോണ്‍ മാഷ് ലെന്‍സിടീച്ചറോടുള്ള നീരസം പ്രകടമാക്കി.
“കടലയുടെ വില എത്രയാന്നേ അറിയുള്ളു ; പയറിന്റെ വില അറില്ല . അപ്പോ പ്പിന്നെ കിട്ടണ കാര്യം
പറയുക തന്നെ “ ന്യൂട്ടണ്‍ മാഷ് ലെന്‍സിടീച്ചറെ പരിഹസിച്ചുകൊണ്ടു പറഞ്ഞു.
“ഇങ്ങനെ അതുമിതും പറഞ്ഞിട്ട് കാര്യമില്ല . ഉത്തരം പറയുവാന്‍ പറ്റുമോ എന്ന് നോക്ക് ?” സൂര്യന്‍
മാഷ് പരിഹാസച്ചുവയില്‍ വെല്ലുവിളിച്ചു.
അപ്പോള്‍ ഐന്‍സ്റ്റീന്‍ മാഷ് എണീറ്റുനിന്നു പറഞ്ഞു തുടങ്ങി .
“ ഞാന്‍ ലെന്‍സിടീച്ചര്‍ പറഞ്ഞു നിറുത്തിയിടത്തു നിന്ന് തുടങ്ങാം . അകലെയുള്ള വസ്തുക്കളെ
ചെറുതായി കാണിക്കുക എന്നത് കണ്ണിന്റെ ഒരു പ്രത്യേകതയാണ് .സൂര്യന്‍ ചന്ദ്രനേക്കാള്‍ ഏകദേശം 400 മടങ്ങ് വലുതാണ് . ഭൂമിയില്‍നിന്ന് ചന്ദ്രനിലേക്കുള്ള ദൂരത്തേക്കാള്‍ ഏകദേശം 400 മടങ്ങാണ്ഭൂമിയില്‍നിന്ന് സൂര്യനിലേയ്ക്കുള്ള ദൂരം .വലുപ്പത്തിലുള്ള വ്യത്യാസം ദൂരം കൊണ്ട് പരിഹരിയ്ക്കപ്പെടുന്നു.സൂര്യചന്ദ്ര ബിംബങ്ങള്‍ ഒരേ വലുപ്പത്തിലാകാന്‍ കാരണം ഇതാണ് . ”
ഐന്‍സ്റ്റീന്‍ മാഷ് പറഞ്ഞ് അവസാനിപ്പിച്ചതും ഉഗ്രന്‍ കയ്യടി ക്ലാസ് ആകെ മുഴങ്ങി .
No comments:
Post a Comment