ഒക്ടോബര്‍ 31 ദേശീയ പുനരര്‍പ്പണ ദിനമായി ആചരിക്കും. ഇതിന്റെ ഭാഗമായി സംസ്ഥാനത്തെ എല്ലാ വിദ്യാഭ്യാസ സ്ഥാപനങ്ങളിലും സര്‍ക്കാര്‍ കാര്യാലയങ്ങളിലും രാവിലെ 10.15 മുതല്‍ 10.17 വരെ 2 മിനിറ്റ് മൌനമാചരിക്കുകയും തുടര്‍ന്ന് പ്രതിജ്ഞയുമെടുക്കും. സംസ്ഥാനതല പരിപാടി തിരുവനന്തപുരത്തും ജില്ലാതല പരിപാടികള്‍ ജില്ലാ ആസ്ഥാനങ്ങളിലും നടക്കും. ജില്ലാതല പരിപാടികളുടെ ചുമതല അതത് ജില്ലാകളക്ടര്‍ക്കായിരിക്കും. പരിപാടിയുടെ ഭാഗമായി റാലികളും പ്രഭാഷണങ്ങളും ദേശഭക്തിഗാനാലാപനവും സംഘടിപ്പിക്കും. ഇതോടനുബന്ധിച്ചുള്ള പ്രതിജ്ഞയുടെ പൂര്‍ണരൂപം ചുവടെ. പ്രതിജ്ഞ: രാഷ്ട്രത്തിന്റെ സ്വാതന്ത്യ്രവും അഖണ്ഡതയും സംരക്ഷിക്കുന്നതിനും ശക്തിപ്പെടുത്തുന്നതിനും അര്‍പ്പണബോധത്തോടുകൂടി പ്രവര്‍ത്തിക്കുമെന്ന് ഞാന്‍ ദൃഢപ്രതിജ്ഞ ചെയ്യുന്നു. ഒരിക്കലും അക്രമമാര്‍ഗ്ഗം സ്വീകരിക്കില്ലെന്നും മതം, ഭാഷ, പ്രദേശം തുടങ്ങിയവമൂലമുള്ള ഭിന്നതകളും തര്‍ക്കങ്ങളും രാഷ്ട്രീയമോ സാമ്പത്തികമോ ആയ മറ്റ് പരാതികളും സമാധാനപരവും വ്യവസ്ഥാപിതവും ആയ മാര്‍ഗങ്ങളിലൂടെ പരിഹരിക്കുമെന്നും ഞാന്‍ പ്രതിജ്ഞ ചെയ്യുന്നു.
No comments:
Post a Comment